اليوم العشرين/ التصميم الداخلي

مرحبا ايها الابطال في كل بقاع العالم 

يلا نشوفكم شنو انجزت خلال ال10 ايام الفاتت.

اذكركم اني شاركت بالتحدي لاطور نفسي في التصميم الداخلي واوصل مستوى جيد يخليني اصمم غرفه و اعرف انسق الالوان مع بعضها.

خلال الفترة الفاتت سجلت في كورس الالوان في الديكور و التصميم على منصة معارف و تقريبا وصلت  lecture5 و تعلمت هواي عن الدائرة اللونية كذالك سجلت في كورس برنامج 3D Max الذي يتكون من 137 lecture وصلت حاليا lecture 7 تعلمت تفاصيل واجهة البرنامج كذالك كدرت اصمم كرسي و منضدة و وسادة 

اترككم مع فيديو طريقه تصميم كرسي بسيط مسرع …

لا تشوفون الطريقه سهلة لكن اني جهدت نفسي و تعبت جدا خلال الفترة الفاتت تقريبا ب6 ساعات متقطعة خلال اليوم حتى اكدر اصمم هذا الشي البسيط صراحه راضية على التقدم الي اني وصلته لان استحق التعب .

تعلمت خلال الفترة الفاتت انو الشي الي اخلي ببالي و اصب كل جهدي ووقتي عليه راح احققه لهذا ماكو شي مستحيل .

احلى ما حسيت بي و مازارني من مشاعر هو لمن كمت اكعد من عز نومي حته اشتغل على البرنامج صراحه هذا الشعور جان عظيم لان كدرت ارفع من مكانه حلمي و يكون عدي اغلى من اي شي بلدنيا ومحد يكدر يلهيني عنه . 

اني مستمرة على هدفي حتى لبعد التحدي لان مستحيل اضيع الي صعنته خلال هاي الفترة .

بالخاتمه اني واثقه بنفسي انو اكدر احقق المستحيل و اوصل لكل اهدافي 

و خطتي تقريبا جيدة ممكن اكثف الشغل و الوقت لان وقت التحدي بدأ بالعد التنازلي 

اشوفكم بعد 10 ايام واني مصممة غرفه بسيطة لطيفه تعجبكم كذالك اكون خاتمه كورس الالوان و كورس برنامج 3D max .

احب اوجه امتنان من منصتي الى :- 

• كل اصدقائي الي دعموني الفترة الفاتت بكلامهم الخفيف الظريف. 

•و ممتنه لمرتضى و فريقه للدعم اللطيف 

•كذالك ممتنة لهذة الفرصة الي خلتني اعرف نفسي اكثر و اكتشف معلومات جديدة و مفيدة. 

 

اليوم العاشر / التصميم الداخلي

 مرحبا ايها الابطال بكل بقاع العالم

صارلي 10 ايام مع التجربة اللطيفه مع التصميم الداخلي جان هدفي بيها من البدايه انو اتعلم اساسياتها و اكون قادرة اصمم ديكور غرفه جيد على البرامج الخاصة بالتصميم الداخلي مثل 3D Max .

خلال ال10 ايام الي مرت كدرت اتعلم اساسيات التصميم مع المهندس عمرو محمد و هذا واحد من فيديوهاته تعلمت وياه هواي و صححت افكار كلش هوايه عن التصميم و طبقت الي تعلمته على صور الديكورات في Pinterest و صرت اعرف احلل الصورة .

كذالك خضت تجربة ممتعه بتعلم برنامج AutoCAD لان هو الاساس الي لازم اتعلم منه التصميم بصيغه 2D اخذت كورس عنه على منصة معارف كذالك حضرت فيديو علمني على البرنامج .

و الوقت الي خصصته لكل الي تعلمته جان بمعدل 3 ساعات يوميا و تقريبا التزمت بهذا الشي قدر المستطاع .

رغم ذالك اني مو راضيه عن التقدم الي حققته احس هواي وقت فوتت مني و هواي معلومات لسه ما اتعرفت عليها ححاول ابذل جهد اكبر لان بهذا التحدي عرفت معنى الوقت و انو اني جاي اضيعه على امور تافهة ماتضيف لعقلي شي .

اضافة الى انتابتني مشاعر حب لنفسي و تشويق و دغدغه بالمعدة 😅من اتوتر واني اكتب الي حققته كل 3 ايام  اكبرها جانت مشاعر المسئولية و انو عدي واجب لازم اخلصه بكل حب .

طبعا حبيت صدمه اهلي و عمي بلاخص من عرف اني اتجهت لمجال بعيدا عن مجال الطب الي اني بي و حب يقدملي المساعدة و واعدني مستقبلا من افتح مشروعي هو يساعدني لان هو مهندس معماري و هذا زادني اصرار لتكملة هدفي للاخير .

اخيرا هذة خطتي جانت جيدة بس اضيف عليها تركيزي على Pinterest للتغذيه البصرية  واني متاكدة راح احقق الي دخلت للتحدي بسببه لان مستحيل ايات تخلي كل هذا الوقت يضيع منها .

بأذن الله بعد 10 ايام اكون اعرف ارسم خريطه بيت على الAutoCAD

بالنهايه اني ممتنه لعدة شغلات منها :- 

1- ممتنه لصحتي الي تساعدني اكون قويه دائما  

2- كذالك ممتنه لنعمة عقلي الي يملك ضمير صاحي و مخيلة واسعه جدا

{ ينتقدوني دائما لكوني عايشه بالخيال لكن حان الوقت اثبتلهم ان الاصرار على الخيال و الايمان بي يتحول الى واقع مدهش }