تحدي ال29يوم / الخاتمة

مرحبا بالابطال في كل بقاع العالم 

مرحبا بكل من يحمل حب الخير لاخيه في قلبه 

اذكركم بنفسي 

اني ايات كريم من بابل عمري 22 و موظفة في مستشفى بابل للنسائية و الاطفال .

اني فتاة حالمة عايشة اغلب حياتي في مخيلتي و اغلب احلامي الي تحققت كانت سابقا في مخيلتي لأني اؤمن بعبارة انكليزية تقول 

 Every thing you can imagine is real 

و من دخلت تحدي ال29 يوم اثبتلي حقيقة هذه العبارة اكثر و زاد ايماني بنفسي اكثر لان قبل التحدي ايات جانت شخصية متعاجزة جدا هواي احط خطط و اشتري اجندات حته انظم وقتي و احقق الاهداف الي اريدها لكن التزم يوم يومين و الثالث اترك لكن بالتحدي جانت عدي هواي عوائق و هواي صعوبات لكن تحديت نفسي فعلا و حولت شي من مجرد فكرة بمخيلتي الى واقع .

اني قبل 29 يوم قررت اتحدى نفسي اكون مصممة داخليه و ادرس هندسه الديكور و اتعلمه بعيدا عن الدراسه الاكاديميه و اكدر افتح مشروعي الخاص مستقبلا لكن ماجان عندي اي فكرة منين ابدي و منو راح يعلمني و اني حتى لابتوب ماعندي حته اتعلم على برامج التصميم لكن هلشي ما وكفني رحت استأجرت لابتوب على طول مدة التحدي و بحثت هواي عن نقطة البدايه و لكيتها بتعلم الاساسيات عن التصميم على اليوتيوب ثم دورت عن كورسات لتعلم برنامج AutoCAD و كدرت اتعلمه على منصة معارف كذالك اخذت كورس بالالوان على نفس المنصة و اخذت بي شهادة 

بعدها انتقلت اتعلم برنامج 3D max و لكيت عليه كورس شامل على منصة معارف لكن الكورس جدا طويل مكدرت اكملة بهذة الفترة القليلة

اضافة الى اني انصابيت بكورونا بال10 ايام الاخيرة و جانت نسبتي كلش عالية لكن رغم الالم استمريت اخذ دروسي و افتح الابتوب نص الليل من يهدأ ألم راسي و اكعد اطبق الي اخذته ، جانت ايام كلش صعبة و مؤلمة لكن هو هذا يسموه تحدي لهذا جنت اجبر نفسي و اكوم اكمل لان دائما تراودني فكرة اكو ناس اسوء من حالتي و جاي ينجزون اعمالهم ف اني شنو الحجة الي عندي حتى اتكاسل .

و كدرت افهم هواي مصطلحات و اعرف اشتغل هواي ديكورات على البرامج لكن مسيرتي بعدها طويله و اني مستمرة انجزها حتى بعد التحدي بأذن الله .

بالنهاية اتمنى تكونوا تعلمتوا شي من تجربتي و يارب يكون درس هذا التحدي يرافقني لباقي مشاوير حياتي .

بلاخير كونوا حالمين دوما لان الحلم دائما يتحول الى حقيقه و كونوا على يقين دائما ان أي شيء تستطيعون تخيله هو حقيقي و موجود لكن ينتظر منكم ان تستكشفوه و توجدوه للعالم .

كانت تجربة مشوقة و لطيفه اتمنى ان اخوض التحديات دائما و وصولي الى ما اريد هو اعظم انتصار و اعظم جائزة .